पालम तालुक्यातील २० पत्रकारांना १० लाखांचे विमा कवच

 

पालम तालुक्यातील २० पत्रकारांना १० लाखांचे विमा कवच

पालम प्रतिनिधी

व्हॉइस ऑफ मीडिया संघटनेचा पत्रकारांच्या सुरक्षिततेसाठी महत्त्वपूर्ण उपक्रम

पत्रकारांच्या न्याय्य हक्कांसाठी आणि सर्वांगीण उन्नतीसाठी कार्यरत असलेल्या व्हॉइस ऑफ मीडिया या आंतरराष्ट्रीय संघटनेच्या वतीने पालम तालुक्यातील २० पत्रकारांना प्रत्येकी १० लाख रुपयांचे विमा कवच देण्यात आले आहे.

संघटनेचे आंतरराष्ट्रीय संस्थापक अध्यक्ष संदीप काळे यांच्या संकल्पनेतून राबविण्यात येत असलेल्या पंचसूत्री कार्यक्रमांतर्गत हा उपक्रम राबविण्यात आला. महाराष्ट्र राज्याध्यक्ष विजय चोरडिया आणि परभणी जिल्हाध्यक्ष कैलास चव्हाण यांच्या मार्गदर्शनाखाली, तर पालम तालुकाध्यक्ष गुणवंत सराफ यांच्या पुढाकारातून पत्रकारांचा विमा उतरविण्यात आला.

पत्रकारांच्या सुरक्षिततेला प्राधान्य

वृत्तांकन करताना पत्रकारांना अपघातप्रवण ठिकाणे, आपत्तीच्या परिस्थिती तसेच संवेदनशील घटनास्थळी जावे लागते. अशा वेळी पत्रकार आणि त्यांच्या कुटुंबीयांना आर्थिक सुरक्षा मिळावी, या उद्देशाने विमा संरक्षणाचा निर्णय घेण्यात आला.

१५ ऑगस्ट रोजी झालेल्या तालुका कार्यकारिणीच्या बैठकीत पत्रकारांच्या विविध समस्या, अडचणी आणि सुरक्षिततेबाबत चर्चा करण्यात आली. यावेळी २० पत्रकारांचा प्रत्येकी १० लाख रुपयांचा विमा काढण्याचा निर्णय घेण्यात आला. त्यानुसार इंडियन पोस्ट पेमेंट्स बँकेच्या माध्यमातून विमा संरक्षण घेण्यात आले.

कुटुंबीयांना आर्थिक आधार

अनपेक्षित दुर्घटनेच्या प्रसंगी पत्रकारांच्या कुटुंबीयांना आर्थिक आधार मिळावा आणि ग्रामीण भागातील पत्रकारांच्या सामाजिक सुरक्षेला बळकटी मिळावी, या दृष्टीने हा उपक्रम महत्त्वपूर्ण मानला जात आहे.

यावेळी तालुकाध्यक्ष गुणवंत सराफ यांच्यासह चांद तांबोळी, भास्कर लांडे, धोंडीराम कळंबे, गोविंद सोलेवाड, रुखमाजी गिणगीने, शिवाजी शिंदे, प्रल्हाद पांचाळ, भगवानराव करंजे, विनोद कांबळे, गणेश काकडे, सुनील कवटकवार, केरबा बहिरवाड, अंबादास ठाकूर, रावसाहेब व्हावळे, लक्ष्मण दुधाटे, अंकुश वाघमारे, मोतीराम शिंदे, शेषराव सोपने आणि बालासाहेब फुलपगार आदी पत्रकार उपस्थित होते.

ग्रामीण पत्रकारांच्या सुरक्षिततेसाठी घेतलेले हे पाऊल कौतुकास्पद असून, सामाजिक सुरक्षेच्या दृष्टीने हा उपक्रम आदर्श ठरणारा आहे.