"कर्मयोगी आबासाहेब" चित्रपटाचा ट्रेलर बाईसाहेबांच्या हस्ते लाँच २५ ऑक्टोबर रोजी मराठीसह हिंदी भाषेत चित्रपट जगभर प्रदर्शित होणार

 "कर्मयोगी आबासाहेब"  चित्रपटाचा ट्रेलर बाईसाहेबांच्या हस्ते लाँच

२५ ऑक्टोबर रोजी मराठीसह हिंदी भाषेत चित्रपट जगभर प्रदर्शित होणार

बीड प्रतिनिधी :- सोलापूर जिल्ह्यातील सांगोला विधानसभा मतदारसंघात तब्बल ११ वेळा आमदार राहिलेले तसेच दोन वेळा राज्याच्या कॅबिनेट मंत्रीपदी राहिलेले दिवंगत गणपतराव देशमुख उर्फ आबासाहेब यांच्या जीवनावर आधारित कर्मयोगी आबासाहेब या चित्रपटाचे ट्रेलर आबासाहेबांच्या पत्नी रतनबाई देशमुख उर्फ बाईसाहेब यांच्या हस्ते लॉन्च करण्यात आले. यावेळी त्यांनी चित्रपटाचे लेखक दिग्दर्शक अल्ताफ दादासाहेब शेख यांचा शाल व पुष्पगुच्छ देऊन सन्मान केला तसेच चित्रपट छान बनविल्याची प्रतिक्रिया दिली.

राजकारणापेक्षा समाजकारणाला महत्त्व देणारे दमदार आमदार, राज्याचे कॅबिनेट मंत्री राहिलेल्या दिवंगत गणपतराव देशमुख म्हणजेच सर्वांचे आबासाहेब यांच्या जीवनकार्याचा वेध "कर्मयोगी आबासाहेब" या चित्रपटातून घेतला गेला आहे.

दिवंगत गणपतराव देशमुख यांच्या पत्नी रतनबाई देशमुख (बाईसाहेब) यांच्या हस्ते चित्रपटाचा ट्रेलर सांगोला येथे  लाँच करण्यात आला. याप्रसंगी उल्हास धायगुडे, बाळासाहेब झपके संपूर्ण सांगोलकर मंडळी आणि शेतकरी कामगार पक्षाचे नेते, कार्यकर्ते आवर्जून उपस्थित होते. २५ ऑक्टोबर रोजी मराठीसह हिंदी भाषेतही हा चित्रपट जगभरात प्रदर्शित होत आहे. मायका माऊली फिल्म प्रॉडक्शन आणि मुंबई क्रिएशन एंटरटेन्मेंटच्या मारुती तुळशीराम बनकर, बाळासाहेब महादेव एरंडे यांनी चित्रपटाची निर्मिती केली आहे. अल्ताफ दादासाहेब शेख यांनी चित्रपटाचे लेखन, गीतलेखन आणि दिग्दर्शन केले आहे. अवधूत गुप्ते यांनी संगीत, कुमार डोंगरे यांनी छायांकन आणि संकलनाची जबाबदारी निभावली आहे. कुणाल गांजावाला, मनीष राजगिरे यांनी गाणी गायली आहेत. चित्रपटात अनिकेत विश्वासराव, हार्दिक जोशी, देविका दफ्तरदार, पृथ्विक प्रताप, विजय पाटकर, प्रदीप वेलणकर, सुरेश विश्वकर्मा, अरबाज शेख, तानाजी गलगुंडे, घनश्याम दरोडे (छोटा पुढारी), अहेमद देशमुख, वृंदा बाळ, निकिता सुखदेव, अली शेख, अल्ताफ दादासाहेब शेख यांच्या प्रमुख भूमिका आहेत. कार्यकारी निर्माता अमजद खान शेख असून प्रोडक्शन कंट्रोल सय्यद दादासो शेख यांनी काम पाहिले आहे.